Ergaa Komishinaraa

Mootummaan Naannoo Oromiyaa Karoora Imala Badhaadhinaa, KIB (2013-2022) qopheessuun raggaasisee hojiirra oolchaa jira. Waggoota muraasa darban keessattis bu’aawwan jajjabeessoo ta’an galmeessisuun danda’ameera. Fkf sochii gama diinagdee guddisuutiin taasifame qofaa yoo ilaalle, haala rakkisaa idili-addunyaa fi biyyaa keessatti hundumtaan oomishaa naannoo (RGDP) Oromiyaa waggoota lamaan darban waggatti giddu-galeessaan %7.3 agarsiisee jira. Galiin madda naannoo bara 2012 tti Qr Bil 25.33 ture bara 2014 tti Qr Bil 58.66 irra gahuun waggatti giddu-galeessaan guddina %52.2 galmeessisuu danda’eera. Haa ta’uu malee ammas qaala’insi gatii fi hojidhabdummaan hir’ina gama intarpiranarummaa fayyadamummaa teknolojii akkasumas hanqina sirni gabaa keenya qabuun walittidabalamanii qormaata guddaa diinagdee keenyaa ta’anii argamu.

Ergamni Komishinii karooraa fi Misoomaa Oromiyaa yeroo kanaatis hojirra-oolmaa KIB cimsuu ta’a. Kanaafis yaadota KIB hawaasa bal’aa fi qooda-fudhattoota biratti hubachiisuu, karoora misoomaa yeroo giddu-galeessaa fi gabaabaa qophaa’u KIB wajjiin akka walsiman taasisuu, fi gamaaggama raawwii fi madaallii bu’a-qabeessuummaa manneen hojii gaggeessuun dhimmoota gurguddoo gama KKMOtiin irratti xiyyeeffataman ta’u. Qulqullinaa fi saffina raawwii KIBtiif akka gargaaru qorannoowwan imaammataa fi tarsiimoowwanii gaggeessuun yaadni fooyya’insaa kan dhiyaatu ta’a. Kana gochuuf dhimmootni lama murteessaa ta’an xiyyeeffannaa akka argatan gochuu barbaachisa. Isaanis ragaa fi dandeettii humna namaa ti.

Gama kanaan qaamolee KKMO cinaa dhaabbatanii milkaa’ina kaayyoowwan KIB tiif gumaacha taasisan hundaa galateeffachaa qindoomini keenya cimee akka itti fufu gaafadha.